திருமூலர் (பதினென் சித்தர்கள்… 13)

0
1 full

திருமூல நாயனாரும் திருமூல சித்தரும் ஒருவரே. இக்கருத்து சேக்கிழாரின் திருமூலநாயனார் புராணக்கருத்து. திருமூல நாயனாரின் ஞானமும் (11 பாடல்கள்) சித்தர் திருமூலரின் திருமந்திரமும் அவர் தவத்தினால் சிவநிலை அடைந்தார் என்பதையே வலியுறுத்துகின்றன. அவர் தவ வாழ்க்கையை மட்டுமே வாழ்ந்தார் என்ற ஒரே கருத்தை பிற சித்த நூல்களும் புராணங்களும் கூறுகின்றன.

அறியக்கிடைத்த (நம்பக்கூடிய) வரலாறு

நாயன்மார்களில் திருமூலர் திரு நட்சத்திரம் ஐப்பசி மாதம் மூல நட்சத்திரம். இது சிதம்பரம் முதலான அனைத்து சிவாலயங்களும் கொண்டுள்ள நட்சத்திரம். இந்த சித்தர் மூல நட்சத்திரத்தில் பிறந்ததாலேயே திருமூலர் என்று அழைக்கப்படுகிறார் என்று கொள்வதே பொருத்தமானது.

2 full

அவர் வேளாளர் குலம் ஒன்றின் 21வது தலைமுறையைச் சேர்ந்தவர் (போகர் 7000/5737) ஆயிரத்துக்கு அதிகமான ஆண்டுகள் சமாதி கூடியே வாழ்ந்தவர் (போ.5862). அவர் திருமந்திரம் 3000 பாடல்களைப் பாடியுள்ளார்.

கடைசியில் (3000 ஆண்டு முடிவில்) திருவாவடுதுறையில் உள்ள சிவாலயத்தின் மேற்கேயுள்ள அரச மரத்தடியில் ஜீவசமாதி பூண்டு அருளாட்சி செய்து வருகிறார். இதற்குத் திருவாவடுதுறை தலபுராணமே சான்றாக உள்ளது.

சேக்கிழாரின் பெரிய புராண வரலாறு

பாடல்கள் 3564-3591

திருமூலர் கயிலையில் நந்தி அருள் பெற்ற நான்மறையோகி பொதிகை மலையில் வாழும் குறுமுனியுடன் சிலநாள் சேர்ந்து வாழும் நோக்கத்தில் கயிலை மலையிலிருந்து வந்து கொண்டிருந்தார். திருவாவடுதுறை வந்து அங்கு பசுபதிநாதரை வழிபட்டு சாத்தனூரை அடைந்தார். அங்கு மூலன் என்னும் மாடு மேய்ப்பவன் வினைப்பயனால் இறந்து கிடக்க பசுக்கள் துயரத்தோடு அவனைச் சூழ்ந்து நின்றன. அப்பசுக்களின் துயரத்தை நீக்குவதற்காக தவமுனிவர் தன் உடலை பாதுகாப்பாக ஓரிடத்தில் வைத்துவிட்டு சூக்கும உடலுடன் மூலன் உடலினுள் புகுந்து பசுக்களை யெல்லாம் சாத்தனூரில் உள்ள அவைகளின் வீடுகளில் கொண்டு போய் சேர்த்தார். திரும்பி வந்து பார்க்க தன் ஆதி உடலை காணாமையால் அதை சிவன் செயலாகவே கருதி, மூலனின் உடலிலேயே திருவாவடுதுறைக்குத் திரும்பி வந்து சிவாலயத்தின் மேற்கு திசையில் (குட திசையில்) பெரிய அரசமரத்தடியில் நிஷ்டை கூடி அமர்ந்தார். ஆண்டிற்கு ஒரு பாடலாக திருமந்திர மாலையைப் பாடினார். இப்படியாக 3000 ஆண்டுகளில் 3000 பாடல்களைப் பாடி முடித்து அங்கேயே முக்திபெற்று கயிலாசபதியின் திருத்தாளை அடைந்தார்.

இந்த வரலாற்றைத்தான் ‘திருத்தொண்டர் புராண சாரமும்’, திருத்தொண்டர் திருவந்தாதியும், ‘சிறுசிறு மாற்றங்களுடன் கூறுகின்றன. ‘நந்தி அருளாலே மூலனை நாடினோம்’ (1/30) என்றும் திருமந்திரப்பாடல் வரி இதை உறுதி செய்கிறது.

திருமூலர் சமாதி பற்றிய சித்தர்கள் கருத்து

சென்னை சித்த மருத்து நூல் ஆய்வு மைய நூல்கள் திருமூலர் சிதம்பரத்தில் சமாதி அடைந்துள்ளார் என்று கூறுகின்றன. இதே கருத்தை போக முனிவரும் கூறியுள்ளார். போகர் ‘ஜனன சாகரம்’ 312 ஆம் பாடலின்படி திருமூலர் சிதம்பரத்தில் சமாதி கூடி லிங்க வடிவில் உள்ளார். தில்லை நடராஜர் கோவிலில் அவர் சன்னதி ஶ்ரீமூலன் சன்னதி என்றே உள்ளது. அவருடன் வாழ்ந்த பதஞ்சலி முனிவரும், வியாக்ர பாதரும் அக்கோவிலில் சிலை வடிவில் உள்ளனர்.  திருமூலர் சன்னதியை மையமாகக் கொண்டுதான் பாண்டிய மன்னர்களின் ஆதரவில் கருவூர்தேவரால் சிதம்பரம் நடராஜர் கோவில் கட்டப்பட்டது.

(போகர் ஏ.5769)

திருமூலர் பற்றிய சதுரகிரி தல புராணக் கதைகள்

1.வீரசேனத் திருமூலர் கதை: பாண்டிய நாட்டைச் சேர்ந்த இராசேந்திரபுரி ஒரு சிற்றரசு. அவ்வூர் மன்னனான வீரசேனன் இரக்கமற்றவன். தன் மகிழ்ச்சிக்காக கொலையும் செய்யக் கூடியவன். பசி, பட்டினியால் வாடிய அவன் நாட்டு மக்களும் அவனுடைய அன்பு மனைவியும் கூட அவனை வெறுத்தனர்.

ஒருநாள் ஒரு கொடிய நாக விஷத்தை நுகர்ந்து அவன் இறந்துவிட்டான். அப்போது சூக்கும உடலோடு விண் வழியில் சென்று கொண்டிருந்த திருமூலர் அம்மன்னனின் உடலைச் சுற்றி அரசியாரும் மந்திரிகளும் அழுது புலம்பிக் கொண்டிருந்ததைக் கண்டார். சதுரகிரி சென்று அம்மலை அடுக்கொன்றில் தன் கல்பதேகத்தை மறைத்து வைத்ததுடன் அதற்குத் தன் முதன்மை சீடரான குருராஜனைக் காவல் வைத்துவிட்டு சூக்கும உடலுடன் அரண்மனைக்கு வந்து இறந்த மன்னனின் உடலில் புகுந்து வீரசேனத் திருமூலரானார்.

திருமூலவீரசேனர் ஆட்சியில் இராசேந்திரபுரி செழிப்படைந்தது. மக்கள் எல்லா நலன்களும் பெற்று இன்புற்று வாழ்ந்தனர். அரசியும் பழைய வீரசேனனிடம் அடைந்திராத இன்பங்களை திருமூலவீரசேனரிடம் அனுபவித்தாள். மன்னன் உடலில் இருப்பவர் ஒரு மகா சித்தர் என்பதைத் தெரிந்து கொண்டாள். அவரிடம் அன்பொழுகப் பேசி, அவர் தம் கற்பதேகத்தை மறைத்து வைத்திருந்த இடத்தையும் அத்தேகத்தையும் எரித்து அழிக்கும் முறைகளையும் கேட்டுத் தெரிந்து கொண்டாள். பிறகு மலைவாழ் மக்களான பளிங்கர்களுக்கு பணம் கொடுத்து சித்தரின் உடலை அழிக்கச் சொன்னாள்.

சில ஆண்டுகளுக்குப் பிறகு ஒருநாள் விதி விளையாடியது. நீண்ட காலமாக தன் குரு திரும்பி வராததால் குருராஜன் திருமூலரைத் தேடிக்கொண்டு அரண்மனைக்கு வந்து கொண்டிருந்தார். அவர் நகர்ப்புறம் வந்த சமயம் பார்த்து பளிங்கர்கள், அரசி கூறியபடி சித்தரின் கல்ப தேகத்தை எரித்துவிட்டனர். அன்று வேட்டைக்கு சென்ற மன்னர் வழியில் தன் சீடன் வருவதைக் கண்டு பயந்து அவரை அழைத்துக்கொண்டு மலைக்குகைக்குச் சென்றார்.

தான் பயந்தபடி தன் கல்ப தேகம் எரிந்து கிடந்ததைக் கண்ட திருமூலர் நடந்தவற்றையெல்லாம் ஞானத்தால் உணர்ந்து தெளிந்தார். குருராஜரைத் தனித்து தவம்புரிந்து கரையேற வாழ்த்தி அனுப்பிவிட்டு அரண்மனைக்கு வந்தார். வந்த சில நாட்களிலேயே மீண்டும் தம் தவ வாழ்க்கையைத் தொடர சதுரகிரிக்கே திரும்பி வந்துவிட்டார்.

வீரசேனத் திருமூலர் சம்பு கேசத்திருமூலராய் மாறிய கதை

திருவானைக்காவில் சம்புகேசன் பிராமணன் ஞான மார்க்கக் கல்வியில் சிறந்து விளங்கினான். குருவின் துணையில்லாமலே தன்னால் தவம் பயில முடியும் என்ற கர்வத்தில் அவன் சதுரகிரி சென்று அங்கு பிராணாமத்தைத் தொடங்கினான். தவறாகக் கும்பகம் செய்ததன் விளைவாக மூச்சை வெளிவிட முடியாமல் உயிர்நீத்தான். அவனது ஆவி பிரிந்த அரைமணி நேரத்திற்குள் அங்கு வந்த வீரசேனத்திருமூலர், அரசன் உடலிலிருந்து வெளிப்பட்டு சம்புகேசன் உடலில் புகுந்து சம்புகேசத்திருமூலரானார். தான் குடியிருந்த அரசனின் உடல் பழுது படக்கூடாது என நினைத்து அவன் உடலை ஒரு மரப்பொந்தில் வைத்து மூடினார். அந்த மகாசித்தரின் கைப்பட்ட அந்த மரப்பொந்து தானாகவே மூடிக்கொண்டது. அந்த மரம் இனி அரச மரம் என்ற பெயரில் தழைக்கட்டும் என்று வாழ்த்திவிட்டு சதுரகிரி காட்டுப்பகுதியில் மீண்டும் தம் தவ வாழ்க்கையைத் தொடங்கினார்.

அந்த மலைப்பகுதியிலும் அவருக்கு பல சீடர்கள் வந்து சேர்ந்தனர். அவர்களையெல்லாம் உயர்ந்த தவயோகிகளாக உருவாக்கி சித்திபெறச் செய்தார். அதோடு “திருமந்திரம் எண்ணாயிரம்” முதலான பல நூல்களையும் எழுதி முடித்துவிட்டு சம்புகேசத் திருமூலராக அங்கேயே சமாதி பூண்டார் என்று அகத்தியரின் ‘சௌமிய சாகரம்” கூறுகிறது.

 

3 half

Leave A Reply

Your email address will not be published.